Għalli borma kbira bl-ilma mielaħ u sajjar l-għaġin għal madwar 3 minuti waqt li tħawwad ta’ spiss biex tevita li jeħel. Ixxotta, laħlaħ u poġġi l-għaġin ġo skutella kbira flimkien mat-tursin, il-ġbejna maħkuka, il-mozzarella maħkuka u l-bajd imħabbat. Ħawwar bil-melħ u l-bżar u ħawwad flimkien sew. Qatta’ il-ġbejniet fi kwarti u rrombla bil-prosciutto. Poġġi biċċa kwadra ta’ cling film fuq il-bank tal-kċina, żid mgħarfa kbira mit-taħlita tal-għaġin, poġġi ballun prosciutto fuqha u għatti b’xi ftit aktar mit-taħlita tal-għaġin. Irrombla sewwa f’ballun u orbot flimkien it-truf tal-cling film. Għandek tagħmel bejn tmien u għaxart iblalen tal-għaġin. Iffriża għal mill-inqas 3 sigħat biex iżżomm il-forma.  Saħħan iż-żejt veġetali bejn 160°c u 180°c, neħħi l-cling film tal-blalen tal-għaġin iffriżati u aqlihom immedjatament (meta jkunu għadhom iffriżati) fi gruppi ta’ 3 għal 8 minuti, u aqlibhom bil-mod biex isiru minn kull naħa. Għandhom ikunu ta’ kulur kannella u jqarmċu. Ittrasferixxi fuq kitchen towel biex tneħħi ż-żejt eċċessiv u ħallihom jistrieħu għal madwar 4 minuti qabel ma sservi.