Ibda billi tlesti l-għaġina. Għarbel id-dqiq, it-trab tal-ħami u z-zokkor tal-ġelu fi skutella kbira. Żid il-butir jew il-marġerina u agħġen bil-ponot ta’ subgħajk sakemm ikollok taħlita mrammla. Żid il-qxur maħkuk tal-lumi u tal-larinġ, il-meraq frisk tal-larinġ u l-isfra tal-bajd u ħawwadhom flimkien sakemm ikollok għaġina ratba. Geżwer l-għaġina fil-cling film u kessaħha fil-friġġ għal 30 minuta. Sadattant lesti l-mili. Poġġi l-ingredjenti kollha flimkien fi skutella kbira u ħawwadhom b’idejk biex tifforma taħlita ratba. Ara li t-taħlita ma tkunx twaħħal. Meta l-għaġina tkun kesħet u l-mili jkun lest, ibda fforma l-figolli. Iftaħ l-għaġina fuq wiċċ miksi bid-dqiq għal ħxuna ta’ madwar ¾ ċm. Biex taqtagħha uża l-forom tal-ħadid (għandek bżonn 2 forom tal-għaġina għal kull figolla). Iksi landa bil-karta forn u poġġi l-forom fiha. Imbagħad, iftaħ l-intrita, bħalma tkun għamilt għall-għaġina, u aqta’ forma għal kull figolla. Idlek ħafif nofs il-forom tal-għaġina bl-ilma u għatti kull biċċa bl-intrita. Għatti l-intrita bil-forma l-oħra tal-għaġina biex b’hekk kull figolla jkollha qiegħ tal-għaġina, saff intrita fin-nofs u wiċċ ieħor tal-għaġina. Aħmihom f’temperatura ta’ 180oC għal 35-40 minuta, skont id-daqs. Meta jkunu lesti, oħroġhom mill-forn u ħallihom jiksħu sew qabel taqlagħhom mil-laned. Għall-aħjar riżultat, żejjen il-figolli l-ġurnata ta’ wara, biċ-ċikkulata, il-marżipan, il-ġelu u l-boċċi tal-fidda. Meta tlesti t-tiżjin u l-ġelu jkun għaqad, geżwirhom fil-cling film biex jibqgħu friski. Tista’ tlestihom minn 3 ġimgħat qabel….jekk għandek il-ħila tistenna daqshekk biex taqsamhom!