Biex tagħmel l-għaġina, itfa’ d-dqiq, iz-zokkor u l-butir fi skutella u agħġinhom b’idejk sakemm it-taħlita ssir qisha frak tal-ħobż. B’mgħarfa, ħallat l-isfar tal-bajda u biżżejjed ilma biex tifforma għaġina ratba. Kessaħ l-għaġina għal 30 minuta u idlek landa bil-pizzi ta’ 20ċm. Imbagħad iksi l-qiegħ tal-landa bl-għaġina. Aħmiha waħedha għal 15-il minuta f’temperatura ta’ 200oC. Oħroġha mill-forn u ħalliha tiksaħ sew. Sadattant lesti l-mili tal-lumi billi titfa’ l-meraq tal-lumi, il-corn flour, iz-zokkor u l-ilma fi skutella żgħira. Ħawwad it-taħlita sakemm tiftaħ tagħli. Neħħiha minn fuq in-nar, żid il-qoxra maħkuka tal-lumi, l-isfra tal-bajd u l-butir u ħawwad. Itfa’ l-mili tal-lumi fuq il-bażi tal-għaġina li tkun lestejt u illixxaha b’paletta. Ħalliha toqgħod għal 30 minuta sakemm il-mili jissoda. Imbagħad lesti t-taħlita tal-wiċċ billi tħabbat flimkien l-abjad tal-bajd biex ittella’ l-ixkuma. Żid iz-zokkor, kuċċarina kuċċarina u ħawwad sew ma’ kull kuċċarina li titfa’. Ifrex it-taħlita fuq it-torta tal-lumi u tellagħha b’furketta biex iżżejjen il-wiċċ. Daħħal it-torta fil-forn f’temperatura ta’ 220oC u aħmiha għal 10 minuti sa kwarta, jew sakemm il-wiċċ tagħha jibda jiħmar. Kessaħ it-torta sew qabel isserviha.