Għall-għaġina tal-bagel, ħallat flimkien id-dqiq, il-ħmira, iz-zokkor u l-melħ b’ilma kemxejn fietel biex tifforma għaġina ratba. Għaqqad sewwa għal 5 minuti, imbagħad ittrasferixxi f’kontenitur bi ftit żejt, għatti bil-cling film u ħalliha toqgħod f’post sħun sakemm tirdoppja. Aqsam l-għaġina  f’10 iblalen, irrombla f’forma ta’ sigarru u fforma f’ċirku. Poġġihom fuq wiċċ bi ftit dqiq, għatti b’sarvetta u ħallihom joqogħdu għal 10 minuti oħra. Sajjar b’attenzjoni l-bagels f’ilma jagħli sakemm jitilgħu fil-wiċċ, aqlibhom u agħmel l-istess għal ftit aktar sekondi. Neħħi mill-ilma b’kuċċarun kbir imtaqqab u nixxef b’karta tal-kċina. Ittrasferixxi għall-folji tal-ħami, idlek b’bajda mħabbta u roxx biż-żerriegħa tal-ġulġlien. Sajjar f’forn jaħraq f’temperatura ta’  200°C għal 20 minuta jew sakemm isiru ta’ kulur dehbi. Sadanittant, agħmel l-insalata tat-tiġieġ billi tqatta’ l-bżar ikkulurit u sajjar b’kuċċarina żejt għal 3 minuti sakemm jirtab. Żid u ħawwad il-kari u sajjar għal minuta, segwit miċ-ċatni tal-mangu, il-paprika affumikata u l-biċċiet tal-ananas. Żid u ħawwad it-tiġieġ imsajjar, neħħi minn fuq in-nar u ħalli t-taħlita tibred kompletament qabel ma tħawwad magħha l-mayonnaise u l-ġewż. Biex isservi, aqsam il-bagels u imla bil-mili tat-tiġieġ u l-weraq tal-insalata.