Ibda din ir-riċetta billi tagħmel l-għaġina fil-food processor. Ħawwad flimkien id-dqiq, baking powder, zokkor u l-butir sakemm it-taħlita tixbah frak tal-ħobż, imbagħad żid il-qoxra tal-lumija, l-isfar tal-bajd u l-ħalib u ħawwad ma’ l-għaġina. Uża immedjatament u tħallijiex toqgħod. Poġġi l-għaġina ġo landa tal-kejk b’dijametru ta’ 20cm, għolja 4-5cm. Imbagħad agħmel il-mili billi tħallat flimkien iz-zokkor, lewż mitħun, essenza tal-vanilla, qoxra tal-lumi, l-bajd sħiħ u l-abjad tal-bajd flimkien fi skutella għal minuta jew tnejn. Żid iċ-ċirasa u l-lewż u ferra t-taħlita fil-landa tal-kejk ippreparata. Aħmi fil-forn f’temperatura ta’ 180°C għal bejn wieħed u ieħor 50-60 minuta. Neħħi mill-forn u ħalliha tibred kompletament. Sussegwentement, għamel il-kisja tal-lewż. Poġġi z-zokkor, il-lewż, il-qoxra tal-lumi u l-essenza tal-vanilla flimkien fi processor u ħallat flimkien għal minuta. Żid 4 abjad tal-bajd u ħawwad għal 30 sekonda sakemm ikun ħafif u kremuż. Iċċekkja l-konsistenza, jekk ikun iebes wisq biex tippajpja, żid ftit iktar abjad tal-bajd u ħawwad mill-ġdid. Neħħi t-torta tal-lewż mill-landa. Poġġi rice paper fuq trej tal-ħami nadif u poġġi fuqha it-torta tal-lewż rasha l’isfel fuqha. Ifrex ftit mit-taħlita tal-lewż fil-wiċċ u iċċatja bil-paletta. Imbagħad, poġġi t-taħlita li jifdal f’borża għall-piping mgħammra b’żennuna tal-istilla u ippajpjah kollu, u tuża iż-żejjed biex tagħmel disinn sabiħ fuq nett. Iddekora biċ-ċirasa u l-lewż żejjed u aħmi fil-forn f’temperatura ta’ 180°C għal madwar 20-25 minuta. Meta tkun lestha, tista’ wkoll iżżejjen il-wiċċ bil-bajd tal-Għid taċ-ċikkulata.